أخر تحديث : الإثنين 9 أكتوبر 2017 - 9:25 مساءً

Tamesmunt Taziri di Qasita terzem awal x usselmed n tmaziɣt

 X uɣezdis n yemxumbal i ittedder usselmed n Tmaziɣt di Lmerruk, d tεenkraf n iselmaden i xef tteggen aɣil maḥend ad jjen Tmaziɣt ad sseɣren ca nniḍen, tegga tmesmunt Taziri i tdelsa d tgumi ijj n tegrawt ass n usamas (lḥedd) 8 zi kṭuber di taddart n iḥudreyyen di Qasiṭa ḥuma ad tesserɣ tifawin x usentel a s yexf nnes.

Tesnewju d tmesmunt sin (tnayen) n iselmaden maḥend ad inin timenna nnsen di manaya; Ɛebdelwaḥed Ḥennu i yellan d ijj seg iselmaden n tmaziɣt di Nnaḍur, amen yella εawed d amɣar n tmesmunt n iselmaden n Tmaziɣt di jjihet n ccerq; d mass Muḥemmed Lḥemmuci i yellan d ijj zi tfidiralit tanamurt n tmesmunin timaziɣin i yettwassnen s yisem n “FNAA” , amen yella d ijj seg yinni itterran taynit i yzerfan n yewdan.

Deg umezwaru yeṭṭef awal uselmad Ɛebdelwaḥid Ḥennu, yidar d tabridt i d tekka tmaziɣt ḥuma ad tadef deg yeyyar n usselmed di lmerruk, yessers itt arendad i Teεrabt umi tt ssidfen ɣer usselmed ula d nettat deg imezwura n ssettinat. Yenna Ḥennu belli Taεrabt di xemsa n iseggʷusa tuɣa tudef deg uselmed amenzu di Lmerruk amen yekmel, maca tmaziɣt εad wer yettwag walu zi min tuɣa nnan belli ad tt ɣren marra di tinmal, marra iswiren. Manaya malla yexs ad yini ca yeqqar aneɣ aqqa timexsa tasrtant wer telli ca ɣer ddewla deg uɣezdis a. Yerni Ḥennu yessiwel x tεenkraf i tteddren iselmaden amecnaw inni ittmuttuyen seg tinmel ɣer tenniḍen, ttafen ixf nnsen qqaren asen ad tesseɣrem taεrabt niɣ tafransist. D tεenkraf nneɣni yeqqnen ɣer idlisen n tmaziɣt yudrusen, d imeggiwsen (lmufetticin) n tmaziɣt i wer yellin, d useεqar i tettessen tmaziɣt di tinmel tamerrukit mendun marra ca nneɣni. Manaya yeqqar εebdelwaḥed Ḥennu ixess as ubeddi x uḍar maḥend tmaziɣt ad teṭṭef amkan nnes amen tenna deg yeyyar n usselmed d usegmi.

zeg uɣezdis nnes, inna Muḥemmed Lḥemmuci, ila ddewla n Lmuɣrib war ɣars bu mezri asertan maḥend ad tessɣar iles n tmaziɣt i maṛṛa imerrukeyyen, ujar zi manaya, inna ila lmexzen ameɣrabi war ittweqqar ca iguta i ysinya akked timura imunen (UN) i yteṭṭfen di tmesract n usselmed n yiles n tayemmat d qeṭṭu x uḥinsyu d aṛṛaṣa i tettegg ddewla kunṭṛa i Tmaziɣt d iselmaden nnes; ujar zi manaya, inna ila ayt PJD i yeṭṭfen tanbaḍt n Lmerruk d iɛdawen n Tmaziɣt zi lebda wer nzemmer ad zzaysen nṛaja nitni ad ssemɣaren s Tmaziɣt d iles nnes, min ɣa ijjen Imaziɣen ass a ad rzun x ifessayen nniḍen i zi zemmren ad ɛebbzen ujar x unegraw asertan n Lmeṛṛuk ḥuma ad yerr Tmaziɣt d iles unṣib n tidet i ddewla.

أوسمة :