أخر تحديث : الخميس 5 أكتوبر 2017 - 7:21 مساءً

NEC

aqqa yi da deg yijen teɣmart deg wa umi qqaren amaḍal, ism inu ɛebdelwaḥed, wah ɛebdlwaḥed, dayes “ɛebd” dayes “waḥed”. “ɛebd” texs ad tini “ismeɣ”, “waḥed” texs ad tini “ijj”. isem inu ittawi d s tmaziɣt: “ismeɣ n yijj”. d wa d isem i d ayi ixḍaren, minzi dinn ijj n uxaṛṛeṣ belli marra wenni ɣa yeggen i ca n mmis isem ibedda s “ɛebd” ad as mmernint lḥasanat.

necc seg yewdan a umi wcin isem dayes “ɛebd” maḥend ad adfen jjennet x weɛrur inu. kkreɣ d deg yijj n ddcar dayes iẓeɣran d iɣebrawen d ddmani d ituma d tɣaɣrin d zzwayel d iqubac n waman mmersen x tma n yebriden maḥend ad swen yemsebriden… ura d iqubac tteggen ten x webrid maḥend ad awyen “lḥasanat”… irareɣ iksan iḍerɣalen, ggiɣ carreḥ medjeḥ, ukreɣ lbakur d lmecmac seg leɛrasi, yewta ayi lefqih umi d as d rewleɣ zi tmezyida, ggiɣ ddbazi, ggiɣ timesbedda, qedjbeɣ taryazt inu deg iɣerwaḍ, nedyeɣ i yejḍaḍ, ɛummeɣ di tnedwin d ṣṣwarej… manaya ggiɣ t deg yijj n llṭa tuɣa ttɣileɣ amaḍal d wenni mani lliɣ.

al ami d ijj n wass, amen tuɣa nettcarra lqurɛan di arrwa n tmezgida, am yizan, kul ijj mani ittzebzib weḥḥdes, uca ad yadef ijj n butenyart ttsiqsiq, yus d akides lemqeddem. umi d udfen iṣur yesseɣd uzebzeb nneɣ! yebda bu tṣenṭuḥt nni yessawal akidneɣ s ca n wawal, s tuddarɣelt ima neqceɛ walu di min yenna. xenni d yenḍu lemqeddem, yenna aneɣ: ad traḥem ad teɣrem di “sekwila”, ad tarim s “stilawat” ca d azeggʷaɣ ca d azegza, ad tenḍarem ssmex… nudef ɣer “sekwila ” nni, nendar aɣimi x ujertil n tyiẓḍent i d aneɣ yeccin tideynitin, iɛejb aneɣ uɣimi x lekrasa, uca yebda uqeccar nni ittseqsa aneɣ:

– ma hada? (yesskan aneɣ ɣer tewwart) netterra xas neccin:

– d tawwart.

ad ihezz aṣenṭuḥ, uca ad aneɣ yini:

– hada babun, ɛawduha. ad as nini neccin: – hada babun. ad aneɣ yini: – ɛawduha. ad as nɛawed: – hada babun.. amenni i neqqim nettɛawad: babun, baqaratun, kalbun, rukbatun… xmi tuɣa d nettrewwaḥ ɣer taddart, nettseqsa yemma tneɣ: mamek d as qqaren a yemma i ta? teqqar aneɣ: ta d tawwart. nḍeḥḥek, uca neqqar as: a lla a yemma, hada babun, uca lexdenni ad aneɣ tini: iwa sseɛd nnwem a tarwa inu teɣrim tessnem mamek d as qqaren, aqqa necc ta ssneɣ qqaren as tawwart waha, mani ufiɣ min d ayi teqqarem ammu! seg wami nḍareɣ ajertil, qqimeɣ x lkursi n teflewt, d nitni ttebbaren ayi ijj n yiles s uɣil deg uqemmum, qqaren ayi d wa d iles i cekk ɣa inefɛen, wenni ɣark mɣar nḍar it xak ssenni! yeɛdu min yeɛdun, kkseɣ axarres n ddcar inu i tuɣa ttwaliɣ d amaḍal inu, uca xergeɣ ijj n uxaṛṛes nneɣni yiẓeḍ s imunas n lquds d falasṭin. cwayt s cwayt, xarrseɣ aked yexf inu, ufiɣ necc ssa nitni qqaren ayi cekk seg yinin. haaaaa! sixenta necc d necc, inin d inin! zi ssenni yebda wemɛutrus inu maḥend ad dewleɣ d necc, ad ɛefseɣ x min d‑ayi sseɣren netnin!

Ɛebdelwaḥid Ḥennu.

أوسمة :